1.júlí 2010
Heitur pottur
Nú erum við loksins komin með heitan pott hér á Mjóeyri. Potturinn er u.þ.b. 12 manna og hefur útsýni út og inn fjörðinn. Eftir er að smíða pallinn umhverfis pottinn en það stendur til nú í haust ásamt því að tengja hitaveitu í öll húsin á Mjóeyri.

26.juní 2010
Áttundi og síðasti dagur gönguvikunnar
Aldeilis frábær dagur og frábær vika liðin. 65 manns gengu undir forystu Sævars fyrir Krossanesið og upp að flugvélafalki í dag í frábæru gönguveðri. Allt gekk vel og allir enduðu í lummum á Karlsstöðum hjá Ínu og félögum. Þar las Ingibjörg Þuríður Stefánsdóttir frá Ímastöðum í Vöðlavík fyrir okkur endurminningar og sögur frá víkinni og mannlífinu þar. Inga er móðir Sævars.
Á sama tíma og gengið var fyrir Krossanesið var söguganga og sand-kastalabyggingar í Vöðlavík. Þar mættu líka um 65 manns og gekk Inga með börnum og fullorðnum út víkina og rifjaði upp sögur og fl. Allir fóru svo í lummur á Karlstöðum áður en haldið var heim. Björgunarsveitir af Austurlandi aðstoðuðu okkur með að ferja fólk yfir heiðina og að bílunum á Karlskála, en um 20 unglingadeildarkrakkar gistu í tjöldum í víkinni í nótt. Hlífar Þorsteinsson mætti einnig á 20 manna rútu frá Austfjarðaleið og flutti fólk til baka.
Lokakvöldvaka var svo hér á Mjóeyri þar sem fjöldi tónlistarmanna kom og flutti okkur tónlist og allir fengu sér svo pulsur og kók í boði Eskju. Á þriðja hundrað manns mættu í fallegu kvöldveðri.
Að lokum viljum við Mjóeyringarnir þakka öllum sem með einhverjum hætti komu að gönguvikunni og hjálpuðu til við að láta þetta allt verða að veruleika en hátt á annað þúsund manns tóku þátt í Gönguvikunni í ár.
Leiðsögumönnum, tónlistarmönnum, skipstjórnarmönnum, björgunarsveitarfólki, styrktaraðilum og öllum hinum kunnum við bestu þakkir fyrir.
Án þessa samstillta átaks gæti göngu og gleðivikan aldrei orðið að veruleika.
Við hlökkum til að sjá ykkur 18-25 júní 2011.

25.juní 2010
Sjöundi dagur gönguvikunnar
Blíðskapar veður var í dag og gengu 72 á Svartafjall í morgunn. Ína og Sævar tóku á móti fjallagörpum Farðabyggðar þegar komið var niður en þá nafnbót hljóta þeir sem gengið hafa á öll fjöllin fimm. Í morgunn voru það 18 manns sem kláruðu þau öll í gönguvikunni og verður það að teljast mjög gott miðað við veður framan að.
Náttúrunámskeiðið sem staðið hefur alla vikuna lauk í dag á því að fara í fjöruna hér á Mjóeyri og fjörulífið kannað. Átta frábærir og áhugasamir krakkar tóku þátt í námskeiðinu.
Seinni partinn var gengið upp að Einbúanum í Stöðvarfirði og að steinboganum í Álftafelli en þangað gengu 12 manns undir dyggri fararstjórn Söru Jakobsdóttir.
Kvöldvakan var svo hér á Móeyri en þar mætti frekar skrýtinn sjóræningi sem bar nafnið Eiríkur Langsokkur, ásamt dóttur sinni henni Línu Langsokk. Farið var í ratleik og allir skemmtu sér vel í frábæru veðri fram eftir kvöldi. Að lokum fannst fjársjóðurinn og allir fengu sinn skerf af honum.
Á morgun kl 10.00, síðasta dag Gönguvikunnar ,,Á fætur" í Fjarðabyggð 2010, verður svo gengið fyrir Krossanesið til Vöðlavíkur. Einnig verður fjölskylduganga kl 12.00 frá Karlstöðum í Vöðlavík niður á sand. Gamlir Vöðlvíkingar segja sögur og lummur veða á boðstólnum á Karlstöðum. Hlökkum til að sjá sem flesta þar sem veðurspáin er aldeilis góð fyrir morgundaginn.

24.juní 2010
Sjötti dagur gönguvikunnar
Allt gekk að óskum í Næturgöngunni og var veðrið eins og svo oft á nóttinni með eindæmum gott. Ferðin tók þó um 8 klst. og voru göngugarpar ekki komnir til síns heima fyrr en undir morgunn.
37 manns gengu á Kistufellið(eitt af fjöllunum fimm) í dag og voru þeir Kristinn Þorsteinsson og Árni Ragnarsson fararstjórar í ferðinni. Allt gekk vel og var sæmilegasta veður en því miður ekkert skyggni á toppnum.
Seinnipartinn gengu svo 10 manns upp með Svartagili í Fáskrúðsfirði í frekar leiðinlegu veðri en þar var töluverður vindur og gekk á með skúrum.
Berglind Ósk og Dagný voru svo með kvöldvöku á Randulffs-sjóhúsi í kvöld ásamt Randúlfunum. Þangað mættu 30 manns og allir skemmtu sér konunglega við sögur og söng fram eftir kvöldi.
Á morgun er það svo síðasta fjallgangan en þá verður gengið á Svartafjall og seinnipartinn verður svo gengið upp að Einbúanum sem fallið hefur úr brúnum Gráfells og að steinboganum í Álftafelli í Stöðvarfirði.
Annað kvöld verður svo kvöldvaka á Mjóeyri þar sem þau feðginin Lína og Eiríkur Langsokkur mæta vonandi hress og kát.

23.juní 2010
Fimmti dagur gönguvikunnar
Veðrið var aðeins að stríða okkur í dag. Norð-Austan rigningarsuddi og þokuloft. Engu að síður gengu 40 manns á Hádegisfjall, eitt af fjöllunum fimm í Fjarðabyggð undir leiðsögn Kristins Þorsteinssonar og Árna Ragnarssonar í dag. Ágætis útsýni var af fjallinu og allt gekk vel.
Seinnipartinn leiðsagði svo Þóroddur Helgason 16 manns í fjölskyldugöngu upp með Búðará í Reyðarfirði og niður að virkjunarhúsi Rafveitu Reyðarfjarðar þar sem stöðvarstjórinn Róri tók á móti okkur með veitingum og sýndi fólki hvernig rafmagnið verður til.
Jóhanna Vigdís (Hansa) og Daniel Ara voru svo með tónleika á Randulfs-sjóhúsi í kvöld.
Þangað mættu 80 manns og skemmtu sér konunglega við fjölbreytta söngdagskrá og þökkum við Hönsu og hennar fjölskyldu sérstaklega fyrir heimsóknina til okkar í gönguvikunni.
Þegar þetta er skrifað er svo Ína Gísladóttir að ganga með 9 manns næturgöngu á Jónsmessunótt um Hnjúka og Hellisfjörð til Norðfjarðar og vonum við að allt gangi vel hjá þeim og allir stundi jóga í átt til sólar í morgunsárið.
Á morgun er það svo Kistufellið sem verður klifið en fjölskyldugangan á morgun verður upp með Gilsá í Fáskrúðsfirði og fararstjóri í þeirri ferð verður Eyþór Friðbergsson.
Annað kvöld verður svo Sagnaþulurinn Berglind Ósk með fjölbreytta dagskrá á Randulfssjóhúsi.
Hlökkum til að sjá ykkur.

22.juní 2010
Fjórði dagur gönguvikunnar
43 gengu á Hólmatind undir dyggri leiðsögn Kristins Þorsteinssonar. Ekki var verra að leiðsögumaðurinn þekkti leiðina í dag þar sem töluverð þoka var á fjallinu. Þó grillti niður af og til og veðrið var mjög gott að öðru leyti og allir komust heilu og höldnu upp og niður.
8 krakkar fóru með náttúruskólanum út að Helgustöðum og inn í námuna í dag og fræddust um silfurbergið og fl.
Um 80 göngugarpar og 20 sjóarar mættu á Borgarsand í kvöld í ágætis veðri. Svolítill gutlandi var þó fyrir Hólmanesið en flestir sem vildu fengu þó siglingu heim með bátum Mjóeyrar. Þannig að um 100 manns gæddu sér á hamborgurum og pilsum á Borgarsansi og voru þau Hildigunnur, Pétur Marinó, Hreggviður, Stefnir og Sævar yfirgrillarar.
Í kvöld fóru svo mjög margir, bæði börn og fullorðnir í siglingu hjá kajakklúbbnum Kaj hér á Mjóeyri, en aðstæður voru með ágætum í kvöld, logn en þokumóða. Á annað hundrað manns skemmtu sér hið besta við siglingar hér á eyrinni og þökkum við Kaj mönnum og konum fyrir frábært kvöld.
Á morgun er svo af nógu að taka og byrjum við daginn kl 10 á því að ganga á Hádegisfjall, eitt af fjöllunum fimm. Því næst eða kl 17 verður svo fjölskylduganga upp með Búðará og niður að Rafstöð Reyðarfjarðar það sem þátttakendur geta séð með eigin augum hvernig rafmagnið verður til.
Náttúruskólinn verður fyrir hádegi eins og aðra daga og verða plönturnar í Mjóeyrarhlíðinni skoðaðar á morgun.
Annað kvöld skemmtir svo leik og söngkonan Jóhanna Vigdís okkur á Randulfs-sjóhúsi undir undirleik Daníels Ara.
Af nógu að taka eins og alltaf í gönguvikunni og hlökkum við til að sjá ykkur á morgun.

21.juní 2010
Þriðji dagur gönguvikunnar
53 gengu á Goðaborgina, eitt af fjöllunum fimm, undir dyggri leiðsögn Kidda Þorsteins.
Veðrið var gott og bjart á tindinum en mikill snjór á fjallinu. Gestabókin var á bólakafi.
Allt gekk þó vel og renndu flestir sér á rassinum í snjónum áleiðis niður. Tær snilld!
Fyrsti dagur náttúruskólans var í dag. Fóru þær Berglind Steina og Erlín Emma með þátttakendur inn að Hólatjörnum í Fannardal. Það voru aðeins fjórir nemendur í skólanum í dag en verða væntanlega fleiri á morgun.
Fjölskyldugangan var svo upp með innri Þverá og niður með þeirri ytri og mættu 30 manns í þá göngu undir dyggri leiðsögn Kömmu Daggar sem var að leið segja sína fyrstu ferð. Allt gekk vel og fossarnir skörtuðu sínu fegursta en einhverjir göngugarpar höfðu á orði að þetta væri tveggja skóa ganga en ekki eins skó eins og auglýst var.
Unga fólkið úr Tónlistarskóla Eskifjarðar og Reyðarfjarðar skemmti svo við varðeldinn hérna á Mjóeyrinni í kvöld. Stóðu krakkarnir sig frábærlega undir stjórn Daníels Ara og um 120 manns skemmtu sér konunglega.
Á morgun leið segir svo Kiddi á Hólmatindinn, eitt af fjöllunum fimm og verður lagt af stað kl 10:00. Fjölskylduganga verður svo út í Hólmanes undir leiðsögn Berglindar Steinu. Grillað verður á Borgarsandi um kl 19.00 og eru allir sem vilja sigla þangað velkomnir í grillið.
Reynt verður að bjóða öllum sem vilja far með bátum heim.
Annað kvöld verður svo kajakklúbburinn Kaj með kajaka í Mjóeyrarvíkinni til prufu fyrir þá sem vilja.
Hlökkum til morgundagsins og hvetjum sem flesta til að taka þátt í viðburðum dagsins.

20.juní 2010
Annar dagur gönguvikunnar
Annar frábær dagur að kvöldi kominn. Í dag voru farnar tvær göngur. Sú fyrri var í fótspor Magnúsar sterka en það var gengið frá Útstekk að Sveinstaðareyri í Hellisfirði 20 km. 15 manns gengu undir leiðsögn Sævars og gekk ferðin mjög vel. Félagar úr björgunarsveitinni Gerpi fluttu svo göngugarpa frá Hellisfirði til Norðfjarðar með nýja harðbotna slöngubáti sveitarinnar Glæsi.
Seinna um daginn fór svo Ína með 30 manns í fjölskyldugöngu upp að Hólatjörnum í Fannardal þar sem farið var í leiki sagðar sögur og fl og skemmtu sér allir vel í veðurblíðunni.
Í kvöld spilaði svo Norðfiska bandið FARVEL á Randulffs-sjóhúsi en þangað mættu óvenju fáir, eða um 20 manns. Strákarnir stóðu sig þó frábærlega og þeir sem mættu skemmtu sér vel.
Hlökkum til að takast á við skemmtilegan dag á morgun en þá verður gengið á Goðaborg eitt af fjöllunum fimm undir leiðsögn Árna Ragnars og seinnipartinn verður svo fjölskylduganga upp með þveránum innan við Eskifjörð en þar verður Kamma Dögg Gísladóttir leiðsögumaður þar sem Sævar kemst ekki. Náttúrunámskeið fyrir börn hefst á morgun og þá verður farið í Hólatjarnir til að safna vatnadýrum og þau skoðuð.
Hlökkum til að sjá ykkur í góða skapinu á morgun.

19.Júní 2010
Fyrsti dagur Göngu og gleðivikunnar ,,Á fætur í Fjarðabyggð".
Gleðilega gönguviku gott fólk.
Vikan fer frábærlega af stað og byrjaði með göngu og bátsferð á Barðsneshorn.
Bátarnir sem ferjuðu okkur á milli voru björgunarskipið Hafbjörg og báturinn Mýmir
Þangað mættu um 65 manns og skiptist svo hópurinn í 2 hópa. Annar hópurinn gekk með Ínu styttri hring en hinn með Sævari niður á Mónes og út á Horn. Frábært veður og allir í góðu skapi.
Önnur ganga var svo sólstöðuganga á Álffjall milli Vöðlavíkur og Karlskála. Þangað mættu um 30 manns og gengu aldeilis frábæra göngu í sólstöðuveðri undir dyggri stjórn Kristins Þorsteinssonar. Doddi á Skorrastað sá svo um fjallasöng í ferðinni af sinni alkunnu snilld.
Að lokum var svo kvöldvaka á Radulffs-sjóhúsi undir dyggri stjórn Randúlfanna. Þar flutti Sigmundur Ernir listamaður gönguvikunnar okkur nokkur fjallaljóð og Frissi Þorvalds sagði okkur af verslunarsögu Reyðarfjarðar og Eskifjarðar. Mjög fróðleg og skemmtileg erindi.
Frábær dagur að kveldi kominn og hlökkum við öll til að taka þátt í göngum morgundagsins en þá heldur Sævar í fótspor Magnúsar sterka frá Breiðuvíkurkaupstað til Hellisfjarðar.
Ína fer svo í fjölskyldugöngu upp að Hólatjörnum í Fannardal þar sem farið verður í leiki og fl.
Annað kvöld ætlum við svo að bjóða Norðfirðingum að sjá um fjörið á Randulffs-sjóhúsi en hljómsveitin Farvel mun skemmta okkur.
Hlökkum til morgundagsins.
Minnum á heimasíðuna okkar á facebook http://www.facebook.com/#!/profile.php?ref=profile&id=1694678219
Verðum með myndir frá gönguvikunni þar

11.Febrúar 2010
Mjoeyri á Facebook
Minnum á heimasíðuna okkar á facebook http://www.facebook.com/#!/profile.php?ref=profile&id=1694678219

10.Febrúar 2010
Vetrarsýningin ,,Vetrarsport 2010" Akureyri
Ferðaþjónustan Mjóeyri ætlar að taka þátt í Vetrarsýningunni sem haldin verður í Boganum Akureyri dagana 13.-14.febrúar. Vonumst til að sjá sem flesta.

1. Febrúar.
Ferðaþjónustan Mjóeyri þar sem skíðaferðin byrjar og endar!
Í vetur bjóðum við upp á skíðapakka eins og undanfarin ár. Einnig bjóðum við upp á snjóleðadrátt upp á fjöll fyrir skíða og brettafólk.
Á Mjóeyri er einnig aðstaða fyrir umhirðu skíða og við kappkostum okkur við að sinna þörfum hvers og eins með persónulegri þjónustu. Pakkarnir geta því verið mismunandi, t.d helgarpakki, páskapakki, sólahringspakki, hóppakki, gönguskíðapakki osfrv.
Frekari upplýsingar um útfærslu og verð má fá hjá Sævari í síma 698-6980

1. Janúar 2010
Gleðilegt nýtt ár!
Þökkum viðskiptavinum og velunnurum árið sem nú er liðið og óskum ykkur öllum gleðilegs nýs árs með von um að árið 2010 verði gæfuríkt og skemmtilegt. Vonandi sjáum við sem flesta á árinu.

5.-9. Nóvember ,,Ástarhelgi“ á Eskifirði
Bærinn verður ljósum skreyttur, tónleikar, sýningar, göngur, rómantískur matseðill, ástareldur, bílabíó og margt fleira í gangi fyrir rómantískt fólk. Eskifirðingar eru hvattir til að skreyta hús sín með ljósum, hjörtum og skapa rómantíska stemmingu í bænum. Bæjarbúar hvattir til að gefa hjörtu sín á milli, heimsækja nágranna og gefa af sér

Dagskrá Mjóeyrar:

Laugardagurinn 7.nóvember
Ástareldur kl 20:30
Lifandi tónlist, ástareldur, seiðandi kakó og rómó stemning í fjörunni.

Sunnudagurinn 8.nóvember
Bílabíó Mjóeyri
Kl. 18 Bílabíó – barnasýning
Kl. 20.30 Bílabíó – fullorðinssýning
Ókeypis aðgangur, popp ofl. selt á staðnum.

Þriðjudaginn 10.nóv.
Rökkurkvöld á Randúlffssjóhúsi kl 20:00
Sögustund og lifandi tónlist. Aðgangseyrir. Kr. 1000 fyrir fullorðna og kr. 500 fyrir börn á aldrinum 6-15 ára og eldriborgara.

Tilboð
Við verðum með tilboð á sumarhúsa gistingu í tengslum við ,,Ástarhelgina“ á Dögum Myrkurs aðeins 10.000 kr nóttin fyrir parið. Tilvalið að gista hjá okkur í rólegheitum og taka þátt í ,,Ástarhelgi“ á Eskifirði dagana 5.- 8.nóv. Komdu elskunni á óvart og bókaðu Sumarhús á Mjóeyri. Húsin eru öll búin helstu þægindum með frábært útsýni inn og út Eskifjörð. Sérstök áhersa er lögð á rómó stemmingu þessa daga og öll pör fá glaðning á staðnum.

27. júní
8.dagur gönguvikunnar.
Í dag gengu 50 manns undir leiðsögn Sævars um Miðstrandarskarð og yfir Lokatind að Reykjum. Þoka var í miðjum hlíðum eins og dagana á undan en eins og áður var gengið upp úr henni í skarðinu. Frábært útsýni var á toppnum og yfir í Gilsárdal en hann var fullur af þoku.
Áætlunarskipið Skrúður sótti hópinn svo að Selhellunni og flutti göngugarpa að Brekku í Mjóafirði þar sem Jóhanna og Sigfús tóku á móti hópnum með krækling og hvítvíni eða kakó og vöfflum. Kærkomið eftir góðan göngutúr.
Skrúður fór nokkrar ferðir milli Norðfjarðar og Mjóafjarðar þennan dag með farþega og einnig fóru sumir farþeganna hringinn um Mjóafjarðarheiði með rútu til baka.
Ína fór fjöldskyldugöngu inn í Fannardal, upp að Hólatjörnum ofl. Bjart var upp í miðjar hlíðar í Fannardal og braust sólin af og til í gegnum skýin. Flott gönguveður og allir skemmtu sér vel við sögur og leiki.
Kvöldvaka var svo á Mjóeyri kl 20:00 þar sem fjöldi fólks mætti eða um300+. Vitabandið spilaði, gott kakó og ketilkaffi var á boðstólnum. Eskja bauð svo öllum upp á grillaðar pilsur og drykki og allir skemmtu sér konunglega við leik og söng fram eftir kvöldi.
Síðasti dagskrárliður gönguvikunnar var svo ball í Valhöll en trúlega hafa margir verið orðnir þreyttir eftir viðburðarríka viku og mættu frekar fáir á ballið.
Frábær lokadagur í frábærri viku og þökkum við á Mjóeyri samstarfsaðilum, göngugörpum ög öllum þeim sem tóku þátt í að gera þessa viku svo skemmtilega sem raun bar vitni. Okkur telst til að á þriðja þúsund manns hafi tekið þátt í viðburðum vikunnar með einum eða öðrum hætti og voru um 40 manns að meðaltali í gönguferðunum. Aldeilis frábær þátttaka það.
Við hlökkum til ,,Á Fætur í Fjarðabyggð 2010’’ en ykkur er óhætt að taka frá vikuna 19.-26. júní svo þið getið verið með.  

26. júní.
Sjöundi dagur gönguvikunnar.
Í dag var gengið á Svartafjall 1021m. 40 manns gengu á fjallið og var þoka á göngugörpunum í upphafi göngunnar. 4 menn gengu alla leið frá Mjóeyri en aðrir byrjuðu á gamla veginum yfir Oddsskarð. Sævar gekk á telemarkskíðunum upp enda snjór nánast alla leið. Síðan renndi hann sér að sjálfsögðu niður aftur. Frábært telemarkfæri í Austfirsku ölpunum þó langt sé liðið á júní. Á toppnum var frábært veður blanka logn og sól.
Ína tók svo á móti fjallagörpunum og afhenti þeim sem voru að klára fjöllin fimm í vikunni rósir. Tveir kláruðu í gær. Stefnir kláraði Hólmatindinn eftir hádegið og Kamma kláraði Kistufell líka seinnipartinn. Alls hafa því trúlega 19 manns farið á öll fjöllin það sem af er gönguvikunni.
Seinni partinn var svo Gengið að Einbúanum í Stöðvarfirði og gengu þangað 16 manns en ekki var farið að steinboganum þar sem þoka var á þessum slóðum.
Sjóræninginn Björn Björnsson mætti svo ásamt Vitabandinu hingað á eyrina um kvöldið og tóku um 100 krakkar þátt í fjársjóðsleit sem endaði með því að stór fjársjóðskista fannst og fengu krakkarnir gullpening í verðlaun fyrir hjálpina.
Um 300 manns voru á svæðinu og skemmtu sér vel. Pétur Marino bakaði lummur á járnplötu yfir eldi og Berglind bauð upp á ketil kaffi og kakó.
Frábær dagur og allir ánægðir.
Á morgun verður fjöldskylduganga að Hólatjörnum í Fannardal og á sama tíma verður gengið yfir Miðstrandarskarð niður í Reyki.
Boðið verður upp á krækling og hvítvín og vöfflur og kakó hjá Jóhönnu í Sólbrekku
Farþegaskipið Skrúður flytur svo fólk á milli Mjóafjarðar og Norðfjarðar og annað kvöld verður svo vegleg lokakvöldvaka hér á Mjóeyri.
Að þvi loknu verður svo ball í Valhöll.

25. júni 2009
Sjötti dagur gönguvikunnar
Í dag gengu 27 á Kistufell 1239m og jafnframt hæðsta fjallið af fjöllunum fimm í Fjarðabyggð. Þoka var þegar komið var upp í um 600 metra og gekk á með skúrum á uppleiðinni. Hvast var og því miður ekkert útsýni af fjallinu, en allir fóru þó á toppinn og fengu sinn stimpil.
Seinni partinn var svo gengið upp með Gilsá í Fáskrúðsfirði í ágætis veðri. 13 manns mættu í þessa fjölskyldugöngu sem farin var undir stjórn Eyþórs Friðbergssonar frá Göngufélagi Suðurfjarða. Fólki fannst mjög spennandi að ganga undir foss í ánni og skoða alla fossana sem eru í Gilsá.
Kvöldvaka var svo á Randulffssjóhúsi í kvöld en þar kom fram sagna þulurinn Berglind Ósk frá Fáskrúðsfirði ásamt Randulfunum og Díönu Mjöll.
Um 80 manns mættu  og skemmtu sér konunglega við sögur, rímur og söng.
Á sama tíma var Sævar með sprengjusérfræðingum landhelgisgæslunnar inn við Geithusárgil að eyða sprengjunni sem gönguhópurinn í fjöldskyldugöngunni í gær fann við grjótgarðana. Sjö manns gengu þangað til að mynda og fylgjast með sprengingunni sem var gríðalega öflug og varð til um 150 cm gígur og um 60 cm djúpur. Hvellurinn glumdi allann fjallahringinn í logninu.
Enn einn dagurinn að kveldi kominn, en á morgun verður gengið á Svartafjall 1021m og seinnipartinn verður gengið að Einbúanum og steinboganum í Stöðvarfirði.
Kvöldvakan verður á Mjóeyri með varðeld og lifandi tónlist en þangað mætir einnig SJÓRÆNINGI og leiðsegir hann börnum á öllum aldri í fjársjóðsleit.

24.júní 2009
Fimmti dagur gönguvikunnar
Í dag gengu 41 á Hádegisfjall í Reyðarfirði, þar af fóru 10 undanfarar en hluti þeirra keyrði suður á Höfn eftir gönguna til að spila fótboltaleik.
Mjög gott gönguveður var á fjallinu og var útsýni til allra átta og m.a. sást Herðubreið mjög vel.
Seinnipartinn fóru svo 67 manns í fjöldskyldugönguna upp með Geithúsarárgili undir fararstjórn heimamannsins Þóroddar Helgasonar. Blanka logn og sól var í göngunni og var þægileg kæling að þurfa að vaða ána ofan við gljúfrið.  Frábær ganga undir góðri leiðsögn í æðislegu veðri og skartaði Geithúsarárgilið sínu fegursta í blíðunni.
Um 200 manns komu svo á kvöldvökuna á Randulffssjóhús en þar sáu þau Jóhanna Vigdís (Hansa) og Daníel Arason um að skemmta fólki. Frábær stemming var í kvöld og þökkum við Hönsu kærlega fyrir frábæran söng og skemmtun, en hún er gestur gönguvikunnar og gistir hér á Mjóeyri. Steini Jaxl, maðurinn hennar deildi svo með okkur skemmtilegum hreindýrasögum héðan af svæðinu, en hann hefur skotið nokkur hreindýr með Sævari.
Þegar þetta er skrifað er Ína að ganga frá Oddsdal um Hellisfjörð til Norðfjarðar.
Því miður höfum við ekki fregnir af fjöldanum í þeirri göngu.
Á morgun verður svo gengið á Kistufell 1239m en það er hæsta fjallið af Fjöllunum fimm  í Fjarðabyggð. Sinnipartinn verður svo fjöldskylduganga upp með Gilsá í Fáskrúðsfirði en annað kvöld verður svo Berglind Ósk með skemmtun á Randulffssjóhúsi.

23.júní 2009
Fjórði dagur Gönguvikunnar
Í dag sprungu allar væntingar okkar á Mjóeyri.
62 gengu undir dyggri fararstjórn Kidda Þorsteins á Hólmatind 985m eitt af fjöllunum fimm og verður það að teljast frábær mæting þar sem veðurútlit var ekkert mjög gott. Enda reyndist þoka og vindur á toppnum. Allt gekk þó vel, utan smá óhapps í upphafi ferðar. Allir komu þó heim aftur sælir og glaðir.
Seinnipartinn var svo gengið undir stjórn Berglindar út í Hólmaborg og yfir að Borgarsandi þar sem Sævar og Stefnir afmælisbarn dagsins voru búir að græja grillin.
Um 100manns gengu með Berlindi og um 30 aðrir komu siglandi í grillið. Veðrið var svolítið blautt til að byrja með en lagaðist svo til muna þegar leið á ferðina.
Landsbankinn í Fjarðabyggð bauð upp á gönguna og veitingarnar. Komu margir að því að ferja fólk og farangur til baka. Aldeilis skemmtilegur seinnipartur sem gaf tóninn fyrir kvöldið.
Kvöldið hófst svo með því að rithöfundurinn Sjón bauð fólki að hlusta á upplestur í Randulfssjóhúsi. Sjón er gestur í Jensenshúsi í gönguvikunni. Um 80 manns mættu á upplesturinn og þar var líka spiluð lifandi tónlist. Frábær skemmtun og þægilegt andrúmsloft.
Kvöldvakan á Mjóeyri toppaði svo góðan dag en þangað mættu á þriðja hundrað manns.
Spiluð var lifandi tónlist í anda Vitabandsins við varðeld og um 60 börn á öllum aldri prufuðu kajaka hjá kajakklúbbnum kaj í Mjóeyrarvíkinni.
Um 500 manns tóku því þátt í viðburðum gönguvikunnar þennan daginn og erum við aðstandendur gönguvikunnar í sjöunda himni með þátttökuna.
Á morgun verður svo gengið á Hádegisfjall 809m í Reyðarfirði. Seinni partinn leiðir Þóroddur Helgason fjöldskyldugöngu upp með Geithúsárgili í Reyðarfirði og segir okkur sögur af svæðinu.
Annað kvöld ætlar svo leikkonan Hansa að skemmta okkur á Randulfssjóhúsi ásamt þeim Randulfunum.
Dagurinn endar svo með göngu undir leiðsögn Ínu Gísladóttir um Hnjúka og Hellisfjörð í Grænanes. Þetta er næturganga á jónsmessunótt og verður ýmislegt gert til skemmtunar í ferðinni.

22.júní 2009
Þriðji dagur gönguvikunnar
Í dag gengu 38 manns á Goðaborg 1132m í Fannardal og var Kristinn Þorsteinsson fararstjóri. Veðrið var eins og best verður á kosið blanka logn, sól og steikjandi hiti. Ef eitthvað er var of gott veður til fjallgöngu.
Allt gekk eftir áætlun og komu fjallagarpar niður um kl 15:00. Því miður er svo mikill snjór á fjallinu að ekki tókst að finna gestabókina en fulltrúar Ferðafélags fjarðamanna voru með í för og votta sigur fjallsins fyrir þá sem taka þátt í fjallaleiknum ,,Fjöllin fimm í Fjarðabyggð”.
Seinni partinn var svo gengið um Helgustaðarnámu, Helgustaðarskarð og Op niður á Oddsdal. Sævar Guðjónsson var leiðsögumaður í þessarri ferð. 22 mættu og komu nokkrir til að skoða námuna en 16 gengu yfir skörðin.15 hreindýr sáust í ferðinni. Allt gekk vel í frábæru veðri og komu leiðangursmenn til byggða um það leiti sem kvöldvakan hófst hér á Mjóeyri.
Á kvöldvökunni spiluðu ungir tónlistamenn, kveiktur var varðeldur og allir skemmtu sér konunglega í blanka logni og sól. Um 130 manns a.m.k komu á kvöldvökuna.
Enn einn góður dagur að kveldi kominn og þáttakan í gönguvikunni aldeilis frábær til þessa.
Á morgun verður gengið á Hólmatind 985m annað af fjöllunum fimm.
Seinnipartinn verður svo fjöldskylduferð út í Hólmanes og svo bátsferð til baka.
Grillað verður kl 19:00 á Borgarsandi og bíður Landsbankinn upp á veitingar handa öllum.
Sjón verður með upplestur og spiluð verður lifandi tónlist á Randulffssjóhúsi kl 20:30 og svo mæta félagar frá kæjakklúbbnum Kaj með kajakana í Mjóeyrarvíkina kl 21:00 þar sem kveiktur verður varðeldur og spiluð lifandi tónlist.

 Hlökkum til að sjá sem flesta.

21.júní 2009
Annar dagur gönguvikunnar
14 manns gengu á Skúmhött í Vöðlavík í gærkvöldi, Doddi á Skorrastað sá um Fjallasöng og kvöldvaka var að lokinni göngu að Karlsstöðum skála Ferðafélags Fjarðamanna þar sem Konráð Ottoson spilaði á nikkuna.
Í dag gengu 27 manns í ,,Fótspor bresku hermanna” um Svínadal, Hrævarskörð og að Veturhúsum. Þetta var þriðja ganga raðgöngunnar byggð úr byggð sem Ferðafélag Fjarðamanna byrjaði helgina fyrir gönguvikuna.
Veðrið lék við göngugarpa, skýað og passlega heitt upp Svínadalinn smá þoka til gamans í gegnum skörðin og svo sól og blíða á niðurleiðinni. Allt eftir pöntun. Frábær ganga með frábærum göngugörpum.
Seinnipartinn gekk svo Ína með tíu manns út á Grænafell í Oddsdal í sól og blíðu. Frábær skemmtun.
Kvöldvakan á Randulffssjóhúsi var skemmtileg og mættu þangað yfir 80 manns en
Hálfdan Haraldsson las upp úr bók sinni Norðfirðingabók.
Daníel Ara og Raggi í Brú spiluðu og allir skemmtu sér vel.
Á morgun verður svo gengið á Goðaborg 1132m og seinnipartinn verður gengið um Helgustaðardal og Op niður á Oddsdal. Þetta er 4 ganga raðgöngunnar byggð úr byggð.
Veðurspáin fyrir næstu daga er mjög góð, suðvestan blíða.

20.juní 2009
Fyrsti dagur gönguvikunnar
57 manns gengu á Barðsneshorn í dag. Farþegaskipið Skrúður flutti göngugarpa yfir flóann í tveimur ferðum. Stærsti hluti hópsins gekk með Sævari niður á Mónes og út fjöruna að steingerfingunum. Það bar þó helst til tíðinda að steingerfingarnir voru horfnir þar sem gríðarstört bjarg hafði fallið úr klettunum og grafið þá undir. Mikil eftirsjá er í þessu stórmerkilega náttúrufyrirbæri.
Því næst var gengið út á horn og inn Móanefin meðfram Rauðubjörgum og til baka að Barðsnesi. Um 14 manns fóru með Ínu styttri sögugöngu og gekk hún m.a. upp í Skollaskarð og út á Vatnshól.
Frábært gönguveður var í dag, léttskýjað og hlítt og er spáin góð fyrir næstu daga.
Jónsmessuganga var svo farin í kvöld á Skúmhött í Vöðlavík, en þegar þetta er skrifað um miðnætti höfðum við ekki fengið fregnir af fjöldanum þar eða hvernig gekk.
Kl:21:00 var svo kvöldvaka á Randulffssjóhúsi og mættu þar um 130 manns. Hermenn mættu á svæðið og las Lord Jens Garðar Helgason fyrir gesti um helförina á Eskifjarðarheiði. Að Sjálfsögðu mætti hljómsveitin Radulfarnir á sæðið og tóku nokkur lög í anda hernámsáranna og söng Svandís Ara með þeim, dansað var og sungið til kl 23:00.
Frábær dagur að baki og við hlökkum til að ganga um Svínadal og Hrævarskörð til Eskifjarðar á morgun.
Seinnipartinn fer svo Ína í fjöldskylduferð á Grænafell í Oddsdal.
Hægt verður að sjá myndir frá gönguvikunni inn á Facebook síðu Ferðaþjónustunnar Mjóeyri.

15.júní 2009
Göngu og gleðivikan ,,Á fætur" í Fjarðabyggð 20.-27.júní
Í gönguvikunni verður boðið upp á margvíslega afþreyingu, fjölskyldugöngur, næturgöngur og hina einstöku fjallameðferð sem fæst í Fjarðabyggð. Keppst verður um hinn eftirsótta titil Fjallagarpur Fjarðabyggðar með því að ganga á fimm krefjandi fjöll sem ferðafélag svæðisins hefur valið.

Alla vikuna verða fjölbreyttar kvöldvökur, lifandi tónlist, varðeldur, náttúru- og leikjanámskeið fyrir börnin, kajakferðir ofl ofl.
Dagskránna má nálgast hér

5.júní 2009
ATH Því miður veðrur Jón KjartanssonSU111 ekki kominn heim úr slipp fyrir Sjómannadag, því mun Aðalsteinn Jónsson fara tvær ferðir laugardsginn 6.júní kl 13:00 og 14:00

2.júní 2009
Sjómannadagshelgin framundan
Frábær dagskrá fyrir alla fjölskylduna frá fimmtudegi til sunnudags. Hlökkum til að sjá sem flesta. Dagskránna má nálgast hér.
Góða skemmtun!!

Eldra:

10.febrúar 2009
Ferðaþjónustan býður upp á skíðapakka, í samvinnu við Skíðamiðstöð Austurlands þriðja árið í röð.
Gisting + Morgunmatur + Nesti + Skíðapassi + kvöldmatur
Möguleiki á akstri til og frá flugvelli, akstri til og frá skíðasvæði, byrjandakennslu, leiðsögn og s.v.frv.
Dæmi um útfærslu á pakka:
Komið á Mjóeyri á föstudagskvöld og til baka á sunnudagskvöld
Gisting í tvær nætur + Morgunmatur + Nesti + Skíðapassi í Oddsskarð + Kvöldverður = 15.000kr m..v 1 pers.

Á Mjóeyri er einnig aðstaða fyrir umhirðu skíða og við kappkostum okkur við að sinna þörfum hvers og eins með persónulegri þjónustu. Pakkarnir geta því verið mismunandi, t.d helgarpakki, páskapakki, sólahringspakki, hóppakki, gönguskíðapakki osfrv.

Frekari upplýsingar um útfærslu og verð hjá Sævari í síma 698-6980 eða með því að senda tölvupóst á mjoeyri@vortex.is

3.febrúar 2009
Fjallameðferð
Fjöllin í Fjarðabyggð eru mjög einkennandi fyrir svæðið og hafa mikil áhrif á mannlífið.  Að dvelja í fjörðunum innan um fegurð fjallana veitir mikin innblástur og óútskýrlanlegan kraft.  Þegar komið er í Fjarðabyggð taka fjöllin þig í faðm sér, bjóða þig velkominn og hugsa vel um þig   Allir eru sammála því að útivist og hreyfing sé nauðsynleg fyrir alla og er fjallameðferð því góð fyrir líkama og sál.  Fjarðabyggð er draumastaður fyrir útivist á svæðinu er fjöldi merktra gönguleiða og hefur svæðið að geyma eitt mest spennandi göngusvæði Íslands Gerpissvæðið milli Norðfjarðar og Reyðarfjarðar sem einnig er austasti hluti landsins. Sama hvert farið er blasir við stórbrotið útsýni, hægt er að njóta kyrrðarinnar og rýna í andlit fjallanna.

Fjallameðferð henntar öllum þar sem í henni getur falist ganga í fallegu umhverfi eftir miserfiðum leiðum, afslöppun í sundlaugunum með frábærri fjallasýn eða að gæða sér á máltíð úr hráefni sem fjöllin gefa.

1.febrúar 2009
Dagskrá Göngu- og gleðivikunnar ,,Á fætur" í Fjarðabyggð tilbúin Dagskránna má finna hér

28. júní 2008
Áttundi og síðasti dagur Gönguvikunnar.
Frábær þátttaka var í viðburðum síðasta dags gönguvikunnar. Enn og aftur var aldeilis gott veður þrátt fyrir vonda spá.
Fyrir Krossanesið og upp að Flugvélaflakinu fóru 31. Blanka logn var nánast alla leið og léttskýjað. Smá haglél gerði þó þegar göngugarpar voru á Valahjalla, en stóð stutt yfir.
Í fjöruferðina í Vöðlavík fóru um 30 manns og nokkrir bættust við akandi. Hóparnir hittust á Karlstöðum þar sem slegið var upp veislu að hætti ferðafélagsmanna.Lummurnar og kakóið hjá Ínu og félögum sló í gegn eins og alltaf.
Lára Valdís Kristjánsdóttir sem átti eftir að ganga á eitt af fjöllunum fimm, (Goðaborg)
kláraði að ganga á það í dag og er þar með áttundi göngugarpur gönguvikunnar.
Norðan gjóla og kalt var á Mjóeyri í kvöld svo ákveðið var að halda lokakvöldvökuna í Randulffssjóhúsi. Mætingin þar var langt umfram væntingar en yfir 200 manns mættu og hlustuðu á Stákana hennar Stínu, Daníel og Ragga spila en í kvöld gekk hljómsveitin undir nafninu Randúlfarnir. Ungir sem aldnir skemmtu sér konunglega við söng og dans og Eskjumenn sáu um að gefa gestum og gangandi pylsur og drykki.

Frábær endir á frábærri viku, og er engin spurning um að þetta verður endurtekið að ári.
Að lokum viljum við hjá Ferðaþjónustunni Mjóeyri þakka öllum þeim fjölmörgu sem tóku þátt í þessu verkefni með okkur og því fjölmarga fólki sem sóttu viðburði vikunnar kærlega fyrir okkur en það voru eitthvað á annað þúsund manns sem tóku þátt í þessu verkefni á einn eða annan hátt. Okkur telst til að um 250 manns hafi mætt í gönguferðirnar sem gerir rúmlega 20 manns að meðaltali í hverja ferð og verður það að teljast ansi góð þáttaka.
Myndir af kvöldvökunum má nálgast á heimasíðu Helga Garðarssonar www.simnet.is/hgard/folk11A/
Einnig koma myndir úr göngunum fljótlega á heimasíðu Ferðafélags Fjarðamanna www.simnet.is/ffau/
Og af öllu saman hér á síðunni hjá okkur.
www.mjoeyri.is

,,Á fætur í Fjarðabyggð” verður með svipuðu sniði vikuna 20.-27. júní 2009 svo látið ykkur hlakka til og takiði vikuna frá.

27. júní 2008
Sjöundi dagur Gönguvikunnar.
Síðasti dagur náttúruskólans var í dag. Farið var í Lamberará, nokkrir steinar teknir og bustaðir og lífverur þeirra skoðaðar í víðsjá í skólanum. Krakkarnir krufðu einnig fiskana sem veiddust á leikjanámskeiðinu í gær, skoðuðu innyfli, magainnihald, heilann ofl. Að því loknu fengu allir viðurkenningarskjal og myndir frá námskeiðinu.
Á leikjanámskeiðinu fóru börnin í Helgustaðarnámu og inn í hellinn. Þaðan fóru þau svo á Útstekk og heimsóttu dýrin á bænum. Bæði námskeiðin gengu mjög vel og þökkum við krökkunum kærlega fyrir samveruna þessa 5 daga.

Frábær þátttaka var í göngunni á Svartafjall í dag en 28 manns gengu upp á fjallið(1021m). Þetta var síðasta fjallið af fjöllunum fimm í Fjarðabyggð, en 7 manns hafa  gengið á öll fjöllin fimm í vikunni. Gott gönguveður var í dag en á fjallinu gekk þó á með hríðarbyljum. Leiðangursmenn þurftu að grafa sig niður á gestabókina þar sem mikill snjór var hér í vetur.  Leiðsögumaður í þessari ferð var Kristinn Þorsteinsson.

Mjög góð þátttaka var einig í göngunni á Harðskafa (650)m). 15 manns mættu þar af þrír sem gengið hafa á Fjöllin fimm í vikunni og virðast þeir vera óstöðvandi í fjallgöngum þessa dagana. Gengið var upp frá Kirkju- og menningarmiðstöðinni á Eskifirði, upp með Bleiksá og þaðan upp í Ófeigsdal og uppúr honum upp á Harðskafann. Farið var svo niður af honum inn í Þverárdal og niður með ytri Þveánni og fossarnir í henni skoðaðir. Mjög gott gönguveður var en gekk á með skúrum á uppleiðinni en góð fjallasýn. Á Harðskafa fundu leiðangursmenn bein sem enn er ekki vitað hvort eru af hreindýri eða unga drengnum sem Arnaldur Indriðason skrifaði um í bókum sínum.
Hreindýrin voru ekki langt undan og sáu göngugarpar nokkuð stóra hjörð norðan í Eskihnjúknum.  Leiðsögumaður í seinni göngunni í dag var Sævar Guðjónsson.

Kvöldvakan í kvöld var haldin á Randulffssjóhúsi en þar héldu uppi fjörinu þeir Daniel Ara og Ragnar Gretarsson. Sagnaþulurinn Berglind Ósk Agnarsdóttir sagði svo kvöldvökugestum nokkrar skemmtisögur, mikið var hlegið og sungið í kvöld.
Á kvöldvökuna mættu um 130 manns og gátum við ekki betur séð en allir skemmtu sér konunglega.
Síðasti dagur gönguvikunnar er á morgun og er vikan því 8 dagar alls. Á morgun verður gengið annars vegar fyrir Krossanesið og úr í Vöðlavík og hins vegar frá Karlsskála í Vöðavík niður á sand. Þessir tveir hópar hittast svo væntanlega í lummum á Karlsstöðum.
Lokakvöldvaka gönguvikunnar veður á Mjóeyri á morgun kl 20.00. Varðeldur verður tendraður, boðið upp á lifandi tónlist, grillaðar pylsur, ketilkaffi og kakó. Allir velkomnir.

26. júní 2008
Sjötti dagur Gönguvikunnar.
Í dag náðu börn náttúruskólans í fallgildrurnar sem settar voru niður á þriðjudag hér á Mjóeyri og fóru með þær í Grunnskólann. Heilmikið af skordýrum veiddust. Þá voru vatnadýrin sem veiddust í gær einnig skoðuð. Daginn enduðu þau á því að heimsæka 2 gæsarunga sem systurnar Fanný og Helena eiga.  Á leikjanámskeiðinu í dag var farið á bryggjuna að veiða ásamt krökkunum úr leikjanámskeiði Austra. Fiskurinn sem veiddist verður notaður til að kryfja í náttúruskólanum á morgun.
Frábær þátttaka var í göngunni í dag en 15 manns gengu upp á Kistufell (1239m). Gengið var upp frá Áreyjum í Reyðarfirði upp hjálpleysu á tindinn. Gott gönguveður var en skyggni var ekki sem best á leiðinni upp á tindinum, á toppnum rofaði til svo sást út Reyðarfjörð. Snjór var í hlíðum fjallsins sem gerði gönguna bara þægilegri því þá þurfti ekki að klífa skriður og á niðurleiðinni gátu göngugarpar bæði ungir sem aldnir notað bossan til að renna sér á.
Leiðsögumaður í þessari ferð var Kristinn Þorsteinsson sem verkefnið ,,Höldum Kidda gangandi” snýst alfarið um, og má með sanni segja að það hafi tekist í dag sem og aðra daga gönguvikunnar.
Kvöldvakan í kvöld var nú haldin á Randulffssjóhúsi en þar héldu uppi fjörinu þeir Daniel Ara og strákarnir hennar Stínu (Guðmann, Þórhallur og Andri Bergmann).
Jens Garðar Helgason las upp úr bókinni Harðskafi eftir Arnald Indriðason, svona til upprifjunar fyrir þá sem ætla að ganga á hann á morgun. Fyrir þá sem ekki vita er Harðskafi fyrir ofan Kirkju og Menningarmiðstöðina á Eskifirði.
Á kvöldvökuna mættu um 120 manns og gátum við ekki betur séð en allir skemmtu sér konunglega við söng og dans.

25. júní 2008
Fimmti dagur Gönguvikunnar.
Þema náttúruskólans í dag var vatnalífríkið. Farið var í tjarnirnar ofan Eskifjarðar og  út að Helgustöðum og vatnalifverum safnað og þær skoðaðar nánar.
17 manns fóru á Hádegisfjall (809m) í Reyðarfirði í dag og gekk ferðin mjög vel í góðu gönguveðri.Ágætt útsýni var af fjallinu en talsverður snjór var síðustu 400m upp á fjallið.
Fararstjóri í þessari ferð var Árni Ragnarson.
7 göngugarpar hafa nú farið á þrjú af fjöllunum fimm í gönguvikunni og er spennandi að vita hvort þeir klára þau öll í vikunni.
KFF félagar skelltu sér á sjó á Mjóeyrarbátunum og var veiðikeppni milli báta. Fiskuðu flestir þokkalega.
Kvöldvakan á Mjóeyri var með hefðbundnu sniði en frekar fáir mættu í kvöld eða um þrjátíu manns. Um hljóðfæraleik og forsöng sáu þeir Daniel Ara og Glúmur. Frekar kallt var í kvöld í hafgolunni og gæti það skýrt hversu fáir mættu. Vel gæti þó verið að það sé bara hálfleikur hjá kvöldvökugestum og þeir séu bara að safna kröftum fyrir seinni hálfleik.
Á morgun verður svo gengið á Kistufell (1239m) og er veðuraspáin fyrir morgundaginn góð.

24. júní 2008
Fjórði dagur Gönguvikunnar.
Jæja þá er fjórði dagur gönguvikunnar liðinn.
8 börn sóttu náttúrunámskeiðið í dag þar sem farið var í gróðurferð og plöntur og búsvæði þeirra skoðuð. Komið var fyrir fallgildrum í Mjóeyrarhlíðinni og verður spennandi að vita hvað verður í þeim í fyrramálið. Eftir hádegi var farið í  leiki og sund.
Göngugarpar á Hólmatind (985m) voru 27 talsins þar af fóru 24 alla leið á toppinn og fengu stimpil í heftið sitt. Frábært gönguveður var í dag og var fjallasýn eins og best verður á kosið. Fararstjóri í ferðinni var Kristinn Þorsteinsson, en sérstakt átak er nú hjá skrifstofum Fjarðabyggðar undir nafninu ,,höldum Kidda gangandi”.

Að lokinni fjallgöngu var ekki amalegt að skella sé í heita potinn í sundlaug Eskifjarðar og láta þreytuna líða úr sér.

Kvöldvakan á og við Mjóeyri var svo til að toppa frábæran dag en þar komu um 150 manns saman í kvöld. Kajakklúbburinn Kaj kom með bátana sína og gátu börn á öllum aldri fengið að reyna sig í kajakróðri. Fjöldinn allur prufaði bátnan á lygnum Eskifirðinum.
Daniel Arason og Ragnar Gretarsson sáu svo um undirspil og forsöng við varðeldinn.
Frábær dagur og ég held við ljúgum engu þó við segjum að þetta hafi verið ,,FJALLEGUR” dagur í Fjarðabyggð þar sem fólk, firðir og fjöll skörtuðu sínu fegursta.

23.júní 2008
Kvöldvakan á Mjóeyri tókst vel í blíðskaparveðri og má segja að Eskifjörður hafi skartað sínu fegursta í kvöld. Sól og blanka logn var og um 80 manns mættu til að orna sér við varðeldinn og þáðu kaffi og kakó. Andri Bergamann og Daníel Arason sáu um hljóðfaraleik og söng. Ungir sem aldnir skemmtu sér konunglega.

23.júní 2008
Gengið á Goðaborg
Goðaborg er eitt af fjöllunum 5 í Fjarðabyggð. Goðaborg er 1132m á hæð og er gengið upp á það úr Fannardal í Norðfirði. 7 göngugarpar héldu á fjallið og voru stimpilkortin með í för. Ekkert var þó stimplað þar sem gestabókin og stimpillinn voru á kafi í snjó. Ferðin verður þó viðurkennd af Ferðafélagi fjarðamanna.Gott veður var á fjallinu en gekk á með þokubökkum fram eftir degi.

23.júní 2008
Náttúru- og leikjanámskeiðið hófst í dag.
7 krakkar tóku þátt í náttúrunámskeiðinu í dag. Farið var í fjöruferð. Fjörudýrum og fjörugróðri safnað og það svo skoðað nánar í náttúrustofu Grunnskólans á Eskifirði.
Aðeins 2 krakkar komu á leikjanámskeið en þau fóru í sveitina, gáfu heimalingum á Engjabakka og Útstekk, skoðuðu blóm, steina, fugla ofl. Mjög góður dagur enda veðrið fínt.

22.júní 2008
Öðrum degi gönguvikunnar lokið
Tvær göngur voru í dag. Farið var með Skrúð yfir að Stuðlum og gengið yfir í Sandvík og þaðan yfir í Vöðlavík. Ferðin gekk vel í góðu veðri. Smá þoka var í fjallatoppum en birti þegar leið á daginn. 19 manna gönguhópur fylgdu okkur upp í Sandvíkurskarð en 17 manna hópur hélt áfram til Vöðlavíkur þar sem jeppar byðu okkur. Vel á annað hundruð hreindyr sáust í ferðinni. Leiðsögumaður var Sævar Guðjónsson
Hin gangan var söguganga við Skuggahlíð. Átta manns nutu leiðsagnar Steinunnar frá Skuggahlíð. Leiðangurmenn voru sammála um að ferðin hafi verið vel lukkuð í alla staði og sögurnar alveg magnaðar.
Kvöldvakan á Mjóeyri tókst vel í blíðskapar veðri. Um 35 manns mættu til að orna sér við varðeldinn og þáðu kaffi og kakó. Þórhallur Þorvalds og Daníel Arason sáu um hljóðfaraleik og söng.

22.júní 2008
Minnum á Náttúru- og Leikjanámskeiðin
Í tengslum við Gönguvikuna ,,Á fætur" bjóðum við ,,Göngugörpum" að koma með börnin til okkar á meðan þeir ganga. Við ætlum, ásamt Náttúrustofu Austurlands, að vera með náttúrunámskeið fyrir hádegi mán-fös frá kl. 9.30 til 12.30. Bjóðum upp á léttar veitingar í hádeginu og förum svo í leiki og sund eftir hádegi til kl 17.00.
Verð krónur 500 fyrir hádegi og 500 eftir hádegi en frítt fyrir börn göngugarpa.

22.juní 2008
Boðið verður upp á 2 gönguferðir í dag
Stuðlar - Sandvík - Vöðlavík. Þriggja skóa ferð. Gengið um Sandvíkurskarð til Sandvíkur og áfram um Gerpisskarð til Vöðlavíkur. Mjög krefjandi ganga. Leiðsögumaður Sævar Guðjónsson.
Sögusteinar við Skuggahlíð í Norðfirði. Létt ganga fyrir alla fjölskylduna. Álfasteinn, Einbúi og Mundlaugarsteinn heimsóttir. Steinunn Steinþórsdóttir segir frá.
Um kvöldið verður svo varðeldur á Mjóeyri. Daníel Arason og Þórhallur Þorvaldsson sjá um lifandi tónlist. Ketilkaffi og kakó fyrir þá sem vilja. Allir velkomnir. Sjá nánari dagskrá

21.juni 2008
Fyrsti dagur gönguvikunnar ,, Á fætur" í Fjarðabygð.
Í dag var farin fyrsta ganga gönguvikunnar, en gegnið var á Barðsnes.
Ekki er hægt að segja annað en gönguvikan lofi góðu en 35 manns fóru með Skrúð, skipi Fjarðaferða, yfir að Barðsnesi og björgunarsveitin Gerpir ferjaði þar fólkið í land.
Veðurguðirnir voru göngugörpum hliðhollir og batnaði, veðrið eftir því sem leið á daginn.
Gengið var út með Rauðubjörgum, niður á Mónes og út að steingerfingunum. Þaðan var svo haldið út á Horn og síðan til baka inn að Barðsnesi þaðan sem skipið flutti göngufólk til baka til Norðfjarðar. Leiðsögumaður í ferðinni var Sævar Guðjónsson en að hanns sögn gat ferðin ekki gengið betur.
Varðeldur og lifandi tónlist var svo kl 21:00 á Mjóeyri að lokinni göngu. Þar mættu um 25 manns og skemmtu sér konunglega. Um tónlistina sáu þeir félagar Daniel Arason (harmonikku) og Ragnar Grétarson (kontrabassa).
Boðið var uppá Ketilkaffi og gott kakó fyrir þá sem þiggja vildu.
Þá var boðið upp á Sólstöðugöngu á Mosfell við Stöðvarfjörð. Alls 18 manns mættu í gönguna og gekk ferðin mjög vel

16.júní 2008
,,Á fætur"
Drífðu þig á fætur og taktu þátt í frábærri dagskrá fyrir alla fjölskylduna dagana 21.-28.júní. Gengið verður á fjöll, farið í fjöruferðir, gengið á reyfaraslóðir þegar farið verður á fjallið Harðskafa, boðið uppá kvöldvökur við varðeld, ýmis tilboð í gangi, náttúru og leikjanámskeið fyrir börnin, keppt um titilinn Fjallagarpur Fjarðabyggðar, boðið uppá Fjallameðferð og margt fleira. Dagskránna má nálgast hér.

8.júní 2008
Brúðkaupsgestir í brunch á Randulffssjóhúsi
Daði Þorsteinsson og Margrét Sara Oddsdóttir giftu sig í gær í Eskifjarðarkirkju. Mikill fjöldi gesta kom til að fagna þessum merka degi með þeim og áður en gestir lögðu af stað til síns heima buðu hjónin upp á brunch í Randulffssjóhúsi.
Við óskum þeim hjónum til hamingju með hvort annað og góðrar ferðar í brúðkaupsferðinni.

7.-8.júní 2008
Enn meiri óvissa
Þrettán manna vinnuteimi Alcoa fór í gær í sólahrings óvissuferð. Ýmislegt var brasað og margt skoðað en ferðin endaði á bátsferð til Viðfjarðar þar sem hópurinn borðaði kvöldmat og gisti um nóttina.

6.júní 2008
Kennarar í óvissu
Kennarar Grunnskóla Eskifjarðar fóru með Sævari í óvissuferð í dag.  Ferðin tókst vel, mikið sungið og mikið gaman!!

4.júní 2008
Færeyingar í heimsókn
Það var mikið fjör þegar stjórnendur færeysku Rafveitunnar kom í heimsókn til okkar á Randulffssjóhúsið í dag.  Færeyingarnir gæddu sig á hákarli og brennivíni og eskfirskum harðfiski. Þá fengu þeir matreiddann fisk úr firðinum og Böðvar frá Brunnavöllum sá um harmonikkuspil.
Markmið ferðarinnar var að skoða álver og virkjanir á Íslandi og að sjálfsögðu komu þeir austur og  heimsóttu Alcoa skoðuðu Kárahnjúkavirkjun, diselrafstöðina á Norðfirði söfn og fl.

30.maí 2008
,,Pottormar” í óvissuferð
Matarklúbburinn ,,Pottormar” komu til okkar í óvissuferð. Ferðin var byrjun á matarkvöldi sem klúbburinn var með síðar um kvöldið. 

28.maí 2008
,,Húllumhæ dagar”
Unglingastig Nesskóla koma í heimsókn í dag í tengslum við ,,Húllumhæ daga” sem nú eru í gangi. Farið var í bátsferð, út í Silfurbergsnámu, grillað ofl. gaman.

24.-25.maí 2008
Sandvíkurferð
Um helginga fór Sævar ásamt Jóni Ævari, forstöðumanni Náttúrustofu Austurlands og Ingvari Ísfeld í hreindýraleiðangur í Sandvík.
Óvenju fáar kýr voru í Sandvík þetta árið en leiðangursmenn sáu á bilinu 50-60 dýr og um 25 kálfa. Að sögn Sævars voru dýrin óvenju dreifð en þeir félagar náðu að merkja 2 kálfa, eina kvígu og einn tarf. Sömu daga voru þau hjónin Gísli Guðjónsson og Jóhanna Lindbergsdóttir í Vöðlavík og sáu þau töluvert af kúm með kálfa þar einnig sáu þau Grátrönu í víkinni.

Bátaleigan færð í Randulffssjóhús
Bátaleiga Mjóeyrar verður nú gerð út frá Randulffssjóhúsi. Opnunartími bátaleigunnar er frá 17-22 alla virka daga og frá 10-22 um helgar. Eða samkvæmt samkomulagi.  Randulffssjóhús verður opið almenningi á opnunartíma bátaleigunnar eða eftir samkomulagi. Meira um Randulffsjóhús

Gönguvikan ,,Á fætur í Fjarðabyggð”
Búið er að sjóða saman dagskrá fyrir gönguvikuna  ,,Á fætur” í Fjarðabyggð sem verður vikuna 21.-28.júní 2008.
Gönguvikunni  er ætlað að skapa nýja, heilsusamlega og fjölskylduvæna vöru í ferðaþjónustu utan háannar.  Um er að ræða fjölbreytta dagskrá sem byggist aðallega á menningartengdum göngu- og skoðunarferðum alla dagana. Kvöldvökur og ýmsar kynningar verða svo á hverju kvöldi auk veglegrar lokahátíðar. Einnig verður boðið upp á námskeið s.s. göngustafanámskeið, rötun, náttúrunámskeið o.fl. Er það von þessarra aðila að verkefnið verði árlegt, og alltaf á sama tíma. Dagskrána má nálgast hér

18.05.2008
Ferðaleiðsögumenn
Útskriftarhópur úr Ferðamálaskóla Íslands kom í heimsókn á Randulffssjóhús. Boðið var upp á hákarl, brennivín og harðfisk frá Eskifirði.

16.05.2008
Óvissuferð Grunnskóla Reyðarfjarðar
Kennarar grunnskólanns á Reyðarfirði komu í óvissuferð í dag.
Ferðin endaði í grillveislu í Austrahúsinu og var að heyra að hópurinn hafi skemmt sér vel!

30.04.2008
Cathy Harlow
Í vetur tók Sævar þátt í námskeiði fyrir hönd Mjóeyrar sem skipulagt var af Útflutningsráði. Námskeiðið bar heitið Hagvöxtur á heimaslóð og fengu Þátttakendur námskeiðsins fengu fræðslu og hjálp við markaðssetningu og vöruþróun innan síns fyrirtækis, auk þess sem fjallað var um samvinnu og aukið vinnuframboð ferðaþjónustuaðila á svæðinu.  Nú hefur farið fram úttekt á árangri þátttakenda í námskeiðinu, einskonar gæðamat. Það var Cathy Harlow, sem sá um úttektina fyrir Útflutningsráð. Hún var mjög ánægð með dvölina á Austurlandi og fannst svæðið mjög spennandi og fallegt. Cathy gisti á Mjóeyri eina nótt og borðaði með okkur kvöldverð ásamt starfsmanni frá Fjaraferðum og Austfjarðaleið.

18.-20.apríl 2008
Fjallameðferð
Fyrsta fólkið sem hlaut formlega Fjallameðferð hjá ferðaþjónustunni Mjóeyri voru þau Jón Viðar og Gréta úr Reykjavík en meðferðin hjá þeim fólst í því að veiða sér til matar og ferðast um fjöll og firnindi á skíðum.  Meira um Fjallameðferð

22.04.2008
Menntaskólinn á Egilsstöðum í heimsókn
Nemendur Menntaskólanns sem setið hafa söguáfangann ,,Saga Austurlands" komu ásamt kennara í heimsókn til Eskfjarðar í dag. Sævar fór ásamt Geir Hólm með hópinn út að Útstekk, Helgustaðarnámu, Sjóminjasafnið og fleiri staði. Auk þess sem stoppað var á Mjóeyri í hádegismat og heilsað upp á Eirík Þorláksson.

3.-5.mars 2008
Rokkað á Eskifirði
Rokkhringur Rásar 2 og Monitor með hljómsveitunum Dr. Spock, Benny Crespo´s Gang og Sign ásamt  Erlu og Sædísi  frá Monitor, Kidda myndatökumanni og Pétri bílstjóra gistu hér á Mjóeyri á ferð sinni um landið. Hljómsveitirnar héldu velheppnaða tónleika í Valhöll föstudagskvöldið 4.apríl

29.feb – 2.mars 2008
Brettaféag Íslands í heimsókn
Rúmlega 20 bretta krakkar frá Brettafélagi Íslands komu í heimsókn um helgina og héldu mót í Oddskarði. Auk þess að vera í fjallinu gerðu þau líka ,,Wallride” á Vitanum og geru nokkur stökk í bænum.

22.03.2008
Páskaeggjaleit
Um 50 krakkar tóku þátt í páskaeggjaleitinni í ár. Þetta var í þriðja sinn sem Ferðaþjónustan á Mjóeyri stendur fyrir slíkri leit. Eggin voru falin víðsvegar á eyrinni, bæði stór og lítil . Flestir fundu egg en eins og áður fór enginn tómhentur heim

20.02.08
Austfirsku Alparnir í Oddsskarði
Frábært skíðafæri hefur verið í Oddsskarði í vetur og hefur skíðasvæðið nú verið opið í 40 daga. Nánast ekkert hefur þurft að nota snjóvélarnar en nýi troðarinn hefur komið sterkur inn.
Ferðaþjónustan á Mjóeyri býður skíða og brettafólk velkomið. Við leggjum sérstakan metnað í að þjóna skiða og brettahópum með fjölbreyttri þjónustu. Hikið ekki við að hafa samband og leita tilboða.

04-02-08
Myndasýning
Myndasyning af gönguferð um Gerpissvæðið var hjá Útivist í kvöld. Sævar leiðsagði myndasýninguna og er ekki hægt að segja annað en viðbrögðin hafi verið mjög góð.
Um hundrað manns mættu á sýninguna og er það met mæting hjá Útivist í vetur.
Við á Mjóeyri þökkum fyrir frábærar móttökur og bakkelsi.

12-12-07
,,Á fætur í Fjarðabyggð”
Ákveðið hefur verið að halda gönguviku í Fjarðabyggð í sumar eða nánar tiltekið vikuna 21-28 júni. Við á Mjóeyri sjáum um skipulagningu dagskrár og verður það gert í samvinnu við Ferðafélag fjarðamanna, Fjarðabyggð og fl. Boðið verður upp á fjölbreytta dagskrá og verða kvöldvökur á hverju kvöldi. Miðað er við að öll fjölskyldan geti mætt og notið viðburða við allra hæfi.
Dagskrá vikunnar verður nánar kynnt hér þegar nær dregur.

15.04.2007 Málþing um Gerpisfriðland Málþing um friðlýsingu Gerpissvæðisins var haldið í dag í Kirkju- og menningarmiðstöðinni á Eskfirði. Um 60 manns mættu . Meðal efnis var kynning á fyrirhuguðu friðlandi, gróðri, dýralífi, jarðfræði og ferðaþjónustu á svæðinu. Ferðaþjónustan Mjóeyri var með erindi á málþinginu og kynnti starfsemi sína og annara þjónustuaðila á svæðinu.

14.04.2007 Frumkvöðull 2007 Ferðaþjónustan Mjóeyri hlaut í dag frumkvöðlaverðlaun Markaðsstofu Austurlands 2007 sem afhent voru á aðalfundi stofunnar. Verðlaunin voru afhent í sjöunda inn og er mikill heiður fyrir okkur á Mjóeyri. Petra Sveinsdóttir, sem löngu er orðin þjóðkunn fyrir steinasafn sitt á Stöðvarfirði, fékk heiðursverðlaunin ,,Kletturinn".

07.04.2007 Frábær mæting í Páskaeggjaleitinni Um 50 krakkar tóku þátt í páskaeggjaleitinni í morgun. Þetta var í annað sinn sem Ferðaþjónustan á Mjóeyri stendur fyrir slíkri leit. Um 44 egg voru falin víðsvegar á eyrinni, 4 stór og 40 lítil. Flestir fundu egg en enginn fór tómhentur heim.

05.04.2007
Sumarhúsin
Nú eru öll sumarhúsin fimm komin í notkun. Það var hljómsveitin Buff sem vígði síðasta húsið.

21.03.2007
Páskaeggjaleit á Mjóeyri
Í tengslum við Páskafjör á Austurlandi verðum við með páskaeggjaleit fyrir börn og fullorðna á Mjóeyrinni laugardaginn 7.aprí kl 9:30. Allir velkomnir. Þátttökugjald á barn kr 200.

Nánari upplýsinar um dagskrá Páskafjörs verður að finna á heimasíðunni www.east.is

8.03.2007 Smáhýsin á Mjóeyri Nú er búið að reisa öll húsin fimm. Þrjú þeirra eru full kláruð. Húsin eru öll um 39m2, búin öllum nútíma þægindum. Fullbúið eldhús með eldavél, ofni, örbylgjuofni, ískáp, borðbúnaði ofl. Í setustofu er sjónvarp, útvarp með cd og aðgangur að interneti. Baðherbergið er með sturtu. Í setustofunni er hornsófi sem auðveldlega er hægt að breyta í tvíbreytt rúm. Á efri hæð er sefnloft þar sem pláss er fyrir 2-3 og inn að því herbergi með tveimur rúmum og svölum.

13.01.2007
Þorrablót 2007
Þorrablót Eskfirðinga verður haldið í Valhöll laugardaginn 20.janúar kl: 20.00. Húsið opnar kl 19.30.
Forsala aðgöngumiða verður þriðjudaginn 16.janúar í Valhöll kl 20. Danshljómsveit Friðjóns leikur fyrir dansi að loknu borðhaldi.

01.01.2007
Gleðilegt nýtt ár
Við sendum vinum, viðskiptavinum og velunnurum bestu óskir um gleðilegt ár með kærum þökkum fyrir heimsóknir, gjafir og góðvid í okkar garð. Mjóeyringarnir.

27.12.2006
Svartfuglinn kominn
Töluverð svartfuglaveiði hefur verið í firðinum undanfarið. Hafa menn verið að veiða á bilinu 20-80 fugla á bát. Fuglinn er feitur og fallegur. Einstök veðurblíða hefur verið og margir bátar voru á veiðum í dag.

26.12.2006
Skíðsvæðið opið
Skíðasvæðið í Oddskarði var opið í blíðskapar veðri og mjög góðu færi í dag, annan í jólum. Mjóeyrarfjölskyldan brá sér á skíði í tilefni af því. Nægur snjó er í Oddskarði og stefnir í góðan og langan skíðavetur. Ferðaþjónustan á Mjóeyri hyggst bjóða upp á skíðapakka í vetur. Þeir sem hafa áhuga geta haft samband til að fá nánari upplýsingar.

24.12.2006
Ferðaþjónustan og fjölskyldan á Mjóeyri óskar viðskiptavinum, ættingjum, vinum og landsmönnum öllum Gleðilegra Jóla og farsældar á nýju ári. Með þökk fyrir árið sem er að líða. Sjáumst vonandi sem flest á nýju ári.

Jólalegt á Mjóeyri

19.12.2006
Nú eru 3 hús af 5 orðin fokheld og eitt af þeim langt komið að innan. Áætlað er að það verði tilbúið til útleigu um miðjan janúar og hin fljótlega eftir það.

21.08.2006
Húsin loksinns komin!!!
Jæja þá eru gámarnir með harðviðarhúsunum frá brasilíuloksinns komnir á eyrina. Fyrsta húsið er þegar byrjað að rísa og lofar það góðu. Flaggað var í tilefni dagsins og dregið fram bakkelsi handa vinnumönnum og fleirum.
Vonum við að uppbyggingin gangi vel og húsin verði tilbúin til leigu í okt, sem er þó 4 mánuðum á eftir upphaflegri áætlun.

19.08.2006
Hreindýraveiðin
Góð hreindýraveiði hefur verið á svæði 5 að undanförnu og margir leiðsögumenn verið með veiðimenn á ferðinni. Sævar hefur farið með nokkra menn undanfarið og gengið vel. Aðal veiðisvæðin eru núna Sandvík, Viðfjörður, Karlsstaðarsveif, Fannardalur og Hellisfjörður. Veðrið hefur leikið við veiðimenn og náttúrufegurð svæðisinns fengist í kaupbæti við vel hepnaðar veiðiferðir.

06.08.2006
Bátaleigan í fullum gangi.
Almenn ánægja er með bátaleiguna og eru þeir sem fara með stöng ánægðir með fiskeríið. Veiðin er þó misskipt en allir hafa þó fengið í soðið. Nokkrir hópar hafa komið og leigt sér báta og grillað svo aflann hérna á Mjóeyrinni hjá okkur. Aðal uppistaðan í því sem veiðist hefur er þorskur og ýsa en þó hafa menn rekið í ýmsar aðrar tegundir svo sem kola, lýsu og fl.sem gaman er að draga á stöng.

01.08.2006
Annari Gerpisgöngunni lokið
Gengið var í 5 daga um eyðibyggðirGerpissvæðisins.
Gönguhópurinn Fjallalömb, alls 18 manns, fengu flestar útgáfur af veðri, en þó var ágætis gönguveður flesta dagana og tókst ferðin að okkar mati mjög vel. Hópurinn, bæði göngugarpar og trússsarar, stóðu sig afar vel í ferðinni.

Ekki vantaði vísurnar og kemur hér smá sýnishorn.

Beygja sig eftir berjum
bústin Fjallalömbi
mega ekki missa af neinu
svo ekki minnki á þeim vömbin.
I.S

Sævar svífur sem léttfætt hind
um síður fjalla allar
um burknirót og berg og lind
af blíðu og ástríðu fjallar.
Grétar Halldórsson

Síðasta daginn var svo gengið fyrir Krossanes og að flaki Henkel 111, þýskrar orustuflugvélar sem fórst í fjallinu í seinni heimstyrjöldinni. Þar fannst, undir steini hriðskotabyssan af vélinni og var henni bjargað.
Byssunni verður komið fyrir á stríðsárasafninu á Reyðarfirði.

25.07.2006
Fyrstu Gerpisgöngunni lokið
Gengið var að vanda um eyðibyggðir Gerpissvæðisins. Gönguhópurinn samanstóð af 18 þrælvönum göngugörpum sem stóðu sig frábærlega. Veðrið lék við hópinn allan tímann og svæðið skartaði sínu fegursta. Ferðaþjónustan á Mjóeyri þakkar fyrir skemmtilega samveru. Fjölmargar skemmtilegar vísur urðu til í ferðinn, hér kemur smá sýnishorn til gamans.

Á Mjóeyri er merktar bú
margt er þar á seyði.
Þar býr Sævar með sinni frú
þar skín sól í heiði
og Eiríkur liggur hauslaus undir leiði.

Berglind hefur brallað margt
bæði and- og verklegt.
Æðir um á fleygifart
föngulegt víf og sterklegt
Hallveig Torlasíus

Anton Berg með blóm í hendi
og ber í hinni
að honum allar vættir vendi
velvild sinni.
Árni Bergmann

Prinsessan í álögum
-tvennskonar viðhorf
Austfjarðarþokan yndisfríð
okkur í faðm sér tók
Niður í fjöru og hátt í hlíð
hún sínar ástir jók.
Kvartar sárum fannst hún krikasíð
kunnu ei við hennar djók
vildu skunda heim um hríð
að heimta pulsu og kók.
Árni Björnsson

Sævar
Það sem aðrir ekki sjá
-það sér hann.
Það sem enginn annar fór
-það fer hann.
Tifar léttur með tóbaksnös
skyggnist með kíki af klettansnös
veiðimaður með vökult auga
-það er hann.

Ekki geta allar ræst
óskir þó að ferð sé glæst
nú er það mín hugsun hæst
hvenar verður étið næst
Finnur Torfi Hjörleifsson

02.07.2006
Bátaleigan tekin til starfa
Nú erhægt að fá báta leigða á Mjóeyri. Bátaleigan er opin frá kl 18-22 alla virka daga og frá 10-22 um helgar. Utan þess tíma samkvæmt samkomulagi. Nánari upplýsingar í síma 477-1247 eða 698-6980.

01.07.2006
Ratleikur Ferðafélags fjarðamanna
Fámennt en góðmennt var í ratleik ferðafélagsins í dag og tóku 2 lið þátt. Meðal þess sem liðin áttu að gera var að semja ljóð um Mjóeyri og tókst það stór vel.

Hópur 1
Á Mjóeyri stendur viti
sem lýsir svo bjart
þar er alltaf sól og hiti
og aldrei neitt svart

Hópur 2
Á Mjóeyri er glens og grín
oft þar er komið saman
enginn er alveg eins og svín
en það væri voða gaman

29.06.2006
Ratleikur fyrir alla fjölskylduna
Laugardaginn 1.júlí verður árlegur ratleikur Ferðafélags fjarðamanna hér á Mjóeyrinni. Ratleikurinn hefst kl 12:00 og eru bæði börn og fullorðnir hvattir til að mæta. Boðið verður upp á léttar veitingar að leik loknum. Mjóeyri ehf sér um skipulagninguna.

23.06.2006
Mjóeyrarflotinn í heimahöfn
Nú eru bátarnir loksins komnir. Stefán Guðjónsson dró bátana á vélbátnum Guðjóni til heimahafnar og var hersingin eins og andarkolla með ungana sína. Bátarnir verða tilbúnir til útleigu fljótlega.

19.05.2006
Allir í sund!
Ný sundlaug var tekin í notkun á Eskifirði í dag. 
Sundlaugin er 25m löng útilaug en auk þess er vaðlaug, 2 heitir pottar og 3 rennibrautir. Þetta er mikil lyftistöng fyrir bæjarfélagið og gesti sem hingað koma.

12.05.2006
Hita mál
Bæjarstjórn Fjarðabyggðar tók til umfjöllunar á fundi sínum 11.maí erindi okkar hvað varðar lagningu hitaveitu að Mjóeyri. Erindinu var hafnað þar sem kostnaður við lögnina yrði of mikill eða um 1,5 milljón. Þar með er útséð með að við hitum gistihúsið og heilsárshúsin með hitaveitu og þurfum við því að leita annarra leiða. Einnig breytir þetta áformum okkar varðandi uppsetningu á heitum potti. Ekki er þó útséð með að við fáum hitaveitu á næstu árum, þar sem hugmyndir eru uppi um íbúðarbyggð á og utan við Mjóeyri.

02.05.2006
Fjöruferð
Grunnskóli Hallormstaðar kom í heimsókn til okkar í dag. Farið var í vísindaferð um fjöruna og lífríkið skoðað. Að lokinni fjöruferð þjáðu nemendur og kennarar heitt kakó á Gistiheimilinu.  

02.05.2006
Heia Norge!
Frændur okkar frá Vesterålen í Norður-Noregi voru á ferð hér á Austurlandi dagana 29.apríl - 1.maí. Heimsóknin er liður í samstarfsverkefni Ferðamálaráðsis í Vesterålen og Markaðsstofu Austurlands. Við hér á Mjóeyri buðum þeim upp á eskfiskan harðfisk frá Sporði, hákarl frá ,,hákarla” Guðjóni og íslenskt brennivín. Þarna voru á ferð ferðaþjóustu aðilar sem hingað komu til að kynna sér náttúrutengda ferðaþjónustu og er fyrirhugað að ferðaþjónustuaðilar héðan fari til Versterålen í haust.

Töluverð ásókn hefur verið í hákarl og brenivín hér í vetur, sérstaklega af fyrirtækjum og smærri hópum.

28.04.2006
Þeir fiska sem róa!
Við hér á Mjóeyri lögðum rauðmaga net í vikunni og drógum netin í dag.  Að því tilefni buðum við vinum í mat þar sem aflinn var soðinn, steiktur og grillaður eftir því sem við átti.   Töluvert veiddist af rauðmaga og rauðsprettu hér rétt innan við eyrina.

27.04.2006
Ferðaskipuleggjendur
Mjóeyri ehf fékk leyfi ferðaskipuleggjanda frá ferðamálastofu í dag og hefur leyfi ti að skipuleggja ferðir undir nafninu ,,Ferðaþjónustan Mjóeyri''.

26.04.2006
Fundarhald
Markaðstofa Austurlands hélt stjórnarfund nýrrar stjórnar hér á Mjóeyri í dag.
Þennan sama dag sat umhverfisnefnd Fjarðabyggðar einnig fund hér þar sem við mjóeyringarnir kynntu þeim fyrirhugaða uppbyggingu í ferðaþjónustu á Mjóeyri og hugmyndir okkar í þeim efnum.

22.04.2006
Óvissuferð Garðars
Garðar Thor Cortes kynþokkafyllsti maður ársins 2005 að mati hlustenda rásar 2 heimsótti Austurland ásamt unnustu sinni Tinnu Gunnarsdóttur um helgina.  Tilgangur ferðarinnar var m.a. að fara í óvissuferð sem hann hlaut að gjöf frá Mjóeyri ehf. Sævar tók á móti þeim á Reyðarfirði og fór með þau í skoðunarferð um Fjarðabyggð, því næst var farið um borð í skemmtibát Einars Sveins Sveinssonar á Norðfirði og silgdi hann með þau með fram Nípunni, yfir að Rauðubjörgum  inn í Viðfjörð þar sem farið var í land og sögur sagðar og nesti borðað. Því næst var haldið í Hellisfjörð og þaðan til Norðfjarðar aftur. Af bátsferð lokinni var svo farið á Eskifjörð þar sem "hákarla" Guðjón var heimsóttur og fengu sægarpar sér hákarl og brennivín að sjómanna sið. Ferðin endaði svo hér á Mjóeyri í kaffi og með því hjá Berglindi.

20.04.2006
Við byggjum!
Mjóeyri ehf hefur fest kaup á 5 heilsárshúsum af fyrirtækinu Nýgifs ehf. Húsin eru 24m2 með baði, setustofu og eldhúsi en í risi eru tvö svefnherbergi. Húsin eru væntanleg í lok maí og eiga að vera tilbúin til útleigu um miðjan júní. Um er að ræða brasilísk harðviðarhús með verönd.

16.04.03.2006
Páskaeggjaleit á Páskadagsmorgun
Þrátt fyrir norðan kalda mættu um 40-50 börn á Mjóeyrina í páskaeggjaleitina. Eggin höfðu verið falin tilviljanakennt um alla eyrina bæði stór og lítil. Flestir fundu egg en aðrir fengu egg hjá Sævari í sárabætur. Ekki var annað að heyra en allir væru sáttir við uppátækið og aldrei að vita en að það verði reynt aftur að ári.

14.04.2006
"Wellness" morgunverður
Um 30 manns mættu í Wellness morgunverð Jónínu og Díönu. Ekki var annað að heyra á gestum sem voru á
öllum aldri að þeir hafi verið ánægðir með framtakið.

1.04.2006
Púðursnjór í Oddskarði
Þó nokkuð hefur snjóað í Austfirsku Ölpunum síðustu daga og nú er þar 20-30cm nýfallinn púðursnjór og góð spá er fyrir helgina. Nú er rétta tækifærið til að pússa rykið af skíðunum fyrir Páskafjörið.
Upplýsingar um opnunartíma er að finna í síma 8781474.

1.04.2006
Mjóeyri festir kaup á smábátum
Mjóeyri ehf hefur ákveðið að festa kaup á 10 Corsiva 430 smábátum af Bátasmiðju Guðmundar í Hafnafirði. Bátarnir eru 4,3m langir og búnir 4hp fjórgengis utanborðs mótorum af gerðinni Selva frá Bátalandi í Hafnafirði. Bátarnir rúma 4-5 persónur og verða björgunarvesti og sjóstangir fyrir alla.
Bátarnir eru væntanlegir á Mjóeyrina í maí næst komandi og verða þar til leigu fyrir þá sem vilja ná sér í fisk á grillið eða fara í skemmtilega siglinu um fjörðinn.

31.03.2006
Páskaeggjaleit á Mjóeyri
Mikil og skemmtileg dagskrá verður í boði í tengslum við Páskafjör á Austurlandi og að sjálfsögðu ætlum við á Móeyri að taka þátt í því. Á Páskadagsmorgun kl 9:30 verður páskaeggjaleit fyrir börn og fullorðna.
Á föstudaginn langa kl 10:00 ætla Díana Mjöll og Guðrún Jónína að vera með "Wellness" morgunverð.
Allir velkomnir.

Nánari upplýsinar um dagskrá Páskafjörs verður að finna á heimasíðunni www.east.is

16.03.2006
Valdi á flot
Gamli trébáturinn hans Valda Friðriks hefur nú verið gerður upp og var sjósettur í dag. Af því tilefni fór fjölskyldan á Mjóeyri í skemmtisiglingu um fjörðinn í blíðskaparveðri.

7.03.2006
Tjaldurinn kominn
Fyrsti tjaldurinn sást í Mjóeyravíkinni í dag. Hann sat á steini við fjöruborðið í sólahring eftir langt og erfitt ferðalag.

26.01.2006
Páskafjör

Á fundi ferðamálafélags Fjarðabyggðar og Markaðstofu Austurlands  sem haldinn var í dag var ákveðið að útfæra Páskafjör í Fjarðabyggð yfir í Páskafjör á Austurlandi, svipað og Dagar myrkurs á Austurlandi. Fjölmargar uppákomur og atburðir verða um allt Austurland, nánar auglýst síðar.

24.01.2006
Skíðasvæðið opið
Skíðasvæðið í Oddskarði opnaði í dag. Til að byrja með verður einungis barnalyftan í Sólskinsbrekku opin en enn vantar snjó til að hægt sé að opna neðri lyftuna austan Norðfjarðarvegar.  Nokkuð meiri snjó þarf til að hægt verði að opna efri lyftuna.  Að sögn staðarhaldara Dagfinns Ómarssonar er hann bjartsýnn á framhaldið og reiknar með nægum snjó fram í maí.   Gjald í barnalyftuna í Sólskinsbrekku er einungis 500 kr. fyrir daginn fyrir alla aldurshópa. Opið verður í dag frá 17:00 - 21:00. Hægt er að nálgast upplýsingar um veður og færi á skíðasvæðinu á textavarpinu á síðu 545 og í símsvara 878-1474.

20.01.2006
Kynþokkafyllsti maður Íslands

Kynþokkafyllsti maður Íslands að mati hlustenda Rásar 2 var valinn í dag.  Hlustendur völdu Garðar Thor Cortes, óperusöngvara.  Hlaut hann m.a. í verðlaun óvissuferð fyrir tvo hjá Mjóeyri ehf.  Við óskum Garðari til hamingju og hlökkum til að taka á móti honum.